रफाएल नदालने पटकावले १९वे ग्रँडस्लॅम जेतेपद

रफाएल नदालने पटकावले १९वे ग्रँडस्लॅम जेतेपद
रफाएल नदालने पटकावले १९वे ग्रँडस्लॅम जेतेपद

अमेरिकन ओपन टेनिस स्पर्धा 2019

  • रफाएल नदालने अमेरिकन ओपन टेनिस स्पर्धा जिंकत कारकिर्दीतील १९वे ग्रँडस्लॅम जेतेपद पटकावले आहे. अत्यंत चुरशीच्या, तब्बल ४ तास ५१ मिनिटे रंगलेल्या लढतीत स्पेनच्या नदालने रशियाच्या दानिल मेदव्हेदेव्हचे कडवे आव्हान ७-५, ६-३, ५-७, ४-६, ६-४ असे परतवून लावले. 
  • हे या ३३ वर्षांच्या टेनिसपटूचे कारकिर्दीतील चौथे अमेरिकन जेतेपद ठरले आहे. आता सर्वाधिक ग्रँडस्लॅम जेतेपदे पटकावणारा रॉजर फेडरर (२० ग्रँडस्लॅम जेतेपदे) आणि नदालच्या (१९ ग्रँडस्लॅम जेतेपदे) जेतेपदांमध्ये आता एकाच ग्रँडस्लॅम जेतेपदाचे अंतर उरले आहे.
  • 'माझ्या १८ वर्षांच्या कारकिर्दीतील ही सर्वात भावूक ग्रँडस्लॅम फायनल ठरली आहे', अशी प्रतिक्रिया नदालने १९व्या ग्रँडस्लॅम जेतेपदाचा धनी झाल्यावर व्यक्त केली. कारण एवढ्या वर्षांनंतरही आपण अव्वल टेनिस खेळत आहोत, याचे समाधान त्याला वाटते आहे. 
  • फायनल पार पडल्यावर संकुलातील जायन्ट स्क्रीनवर नदालच्या ग्रँडस्लॅम जेतेपदांची क्षणचित्रे दाखवली जात होती अन् नदालला अश्रू आवरत नव्हते. त्याने भावनांना अश्रूंद्वारे वाट करून दिली अन् हे पाहून काही क्षण त्याचा प्रतिस्पर्धी मेदव्हेदेव्हही भारावला. त्याची नजर नदालवरून हटत नव्हती. कारण नदालचे आनंदाश्रू बघून संपूर्ण स्टेडियम जोरदार पुकारा करत लाडक्या नदालचे सांत्वन करत होते.

  • जागतिक टेनिस रँकिंगमध्ये दुसऱ्या क्रमांकावर असलेल्या नदालने आर्थर अॅश संकुलात पार पडलेल्या या अंतिम फेरीत बाजी मारत ३.८५ मिलियन डॉलरचे इनाम पटकावले. याआधी २०१०, २०१३ आणि २०१७मध्ये नदालने ही स्पर्धा जिंकली आहे. यंदा जूनमध्येच नदालने कारकिर्दीत बाराव्यांदा ग्रँडस्लॅम स्पर्धा जिंकली. 
  • नवखा, वयाने दहा वर्षांनी लहान असलेला प्रतिस्पर्धी मेदव्हेदेव्हला नदाल सहज हरवेल आणि १९वे ग्रँडस्लॅम जेतेपद जिंकेल असे वाटले होते; पण मेदव्हेदेव्हने नदालला पाच सेटपर्यंत झुंजवले.

विक्रमासाठी नव्हे; आनंदासाठी:-

  • 'पारंपरिक प्रतिस्पर्धी आणि खास मित्र 'रॉजर फेडररचा सर्वाधिक ग्रँडस्लॅम जेतेपदांचा विक्रम मोडण्यासाठी आता एका जेतेपदाची आवश्यकता...', 'जागतिक रँकिंगमध्ये अव्वल होण्याची संधी...', असे कोणतेच विचार माझ्या मनात नाहीत. आनंद फक्त एवढाच आहे की, एवढी वर्षे मी अव्वल टेनिसपटूंच्या पंक्तीतील स्थान कायम राखले आहे...', अशी प्रतिक्रिया दिली नदालने. आनंद आणि फक्त आनंद झालाय, ही अमेरिकन ओपनची ट्रॉफी माझ्यासाठी सर्वकाही आहे, असे नदाल आवर्जून नमदू करतो.
  • तो म्हणतो, 'सामन्यातील अखेरचे तीन तास खूप अवघड आणि मानसिक-शारीरिकदृष्ट्या आव्हानात्मक होते. जेतेपदानंतर इथे दाखवलेला माझा व्हीडिओ, प्रेक्षकांचा पाठिंबा हे सगळेच क्षण खास आणि संस्मरणीय आहेत'. ग्रँडस्लॅम जेतेपदांची संख्या आपली ओळख होण्यापेक्षा चांगले टेनिस खेळणारा यशस्वी टेनिसपटू म्हणून लौकिक व्हावा, अशी आजही नदालची मनीषा आहे. मात्र त्यासाठी प्रत्येक दिवशी सराव आणि दर आठवड्याला स्पर्धेत भाग घेणार नाही, असे तो आवर्जून सांगतो.

खलनायक ते नायक:-

  • कोर्टवरच व्यक्त झालेला संताप, तोडलेली रॅकेट आणि प्रेक्षकांशीच झालेला शाब्दिक वाद, असा भूतकाळ घेऊन अमेरिकन ओपनच्या फायनलमध्ये उतरलेल्या मेदव्हेदेव्हला प्रेक्षकांकडून हुर्योला सामोरे जावे लागले होते; पण आपला झुंजार खेळ, खास करून तिसऱ्या, चौथ्या आणि पाचव्या सेटमध्ये नदालला दमवल्यामुळे प्रेक्षकांनी मेदव्हेदेव्हच्या खेळाला मोठ्या मनाने दाद दिली. त्यामुळे त्याचा यंदाच्या अमेरिकन ओपनमधील प्रवास हा खलनायक ते नायक असा झाला. तो म्हणालादेखील, 'तुम्हा प्रेक्षकांकडून लाभलेल्या या उर्जेमुळेच मी फायनलपर्यंत आलो. मला माहिती आहे, स्पर्धेच्या सुरुवातीलाही मी हेच वाक्य खोचकपणे म्हणालो होतो. आज मात्र ही आनंदाची प्रतिक्रिया आहे. दर्जेदार टेनिस पाहायचे असल्यामुळे तुम्ही प्रोत्साहन देत गेलात आणि माझ्याकडून सर्वोत्तम खेळ झाला. थँक्स मित्रांनो...

What do you think?

Earn & Learn

विद्यार्थीमित्रानो, स्पर्धा परीक्षेची तयारी करताना, अभ्यास करण्यासाठीची प्रेरणा व त्यासोबत आर्थिक पाठबळ या दोन्ही गोष्टी गरजेच्या आहेत. प्रेरणा, नैतिक आधार हा तर आम्ही VISION प्लॅटफॉर्मच्या lectures मधून तर देतच आहोत. राहिला प्रश्न आर्थिक पाठबळ देण्याचा तर त्यासाठीच आम्ही "कमवा व शिका" योजना सुरु केली आहे. हि फक्त योजना नसून गरीब होतकरू विद्यार्थ्यांची जीवन वाहिनी आहे. कमवा व शिका योजनेबद्दल जास्तीत जास्त प्रचार करा म्हणजे जे महाराष्ट्र बेरोजगारी मुक्त करण्याचे स्वप्न आम्ही साकारत आहोत त्याला पाठबळ मिळेल, कारण हो, स्वप्न पूर्ण होतात...!!

Read More »